الدرس الخامس:التزويد فى التريكو وطرقه المختلفه increasing

شكرا لتواجدك وتفاعلك

جزانا واياكى حبيبتى

عادة بيذكر لكى فى الباترون طريقة التزويد اللى هوا عاوزها ولكن لو مذكرش يبقا تستخدمى اى طريقة وانا وضحت فى الدرس الطرق اللى بنستخدمها فى اليمين والطرق اللى بنستخدمها فى الشمال ووضحت ايضا الطرق اللى بتعمل فتحه والطرق اللى مابتعملش ووضحت مميزات وعيوب كل طريقة

اتمنى الصورة تكون وضحت واى استفسار انا تحت امرك

حبيبتى انتى فاهمة غلط

لما بقول ان طريقة من الطرق التزويد نستخدمها فى اليمين مثلا مش بقصد ايدك اليمين ولا بقصد السنارة اليمين ولكن بقصد الناحية اليمين فى الشغل

يعنى القطعة اللى انتى بتشتغليها بيبقا ليها ناحيتين يمين وشمال وفى طرق للتزويد بنستخدمها فى الناحية اليمين للشغل(واللى فيها تميل الغرزة للشمال) وطرق اخرى بنستخدمها فى الناحية الشمال للشغل(واللى فيها تميل الغرزة لليمين)

وهديكى مثال على كدا وتطبيقيه وان شاء الله تكون المعلومة وصلت

شوفى العينة دى من الشغل وهيا عبارة عن 20 غرزة وهشرحلك فيها اول طريقة من التزويد Knit Into Stitch Below وازاى هنطبقها فى الشمال واليمين

السطر الاول= كله عدل
السطر الثانى=كله مقلوب
السطر الثالث=كله عدل
السطر الرابع =كله مقلوب
السطر الخامس(سطر التزويد)=2ع,الناحية الشمال للعمل ثم 14 عدل,الناحية اليمين للعمل , ثم 2ع

عدد الغرز بعد التزويد اصبح 22 غرزة

السطر السادس=كله مقلوب
السطر السابع=كله عدل
السطر الثامن=كله مقلوب
السطر التاسع=كله عدل
السطر العاشر=كله مقلوب

طبقى وانا تحت امرك فى اى استفسار

معليش حتعب حضرتك معايا انا طبقت لحد السطر الرابع لكن السطر الخامس انا عارفة التزويد بس النقطة الى مش فاهمها الناحية اليمين والشمال معليش انا عارفة انى باردة بس عايزاكى توضحيلى اكتر

حبيبتى ولا يهمك انا تحت امرك إسألى براحتك
انا اقصد البلوفر مثلا بيبقا ليه ناحية يمين وناحية شمال
استخدمت طريقة التزويد دى فى ناحية البلوفر الشمال
واستخدمت طريقة التزويد دى فى ناحية البلوفر اليمين

يعنى السطر الخامس = 2ع, ثم 14 عدل, , ثم 2ع

انا كنت بوضح بس امتى تستخدمى كل طريقة فى اليمين او الشمال

قصدك التزويد بيبقى فى وسط الشغل فبيبقى ناحيتين ناحية شمال وناحية يمين يعنى مثلا اشتغل 2ع وبعدين ازود غرزة جهة اليمين وبعدين اشتغل كام غرزة تانى وبعدين ازود غرزة جهة الشمال صح ولا ايه معليش اخر سؤال تانى انا اشتغلت الطريقة التالتة الى هى لقط الخيط بين الغرزيين حقول لحضرتك عملت ايه وتقوليلى صح ولا غلط انا عملت البداية عادى وبعدين فى السطر التانى زودت بين الغرزتين وبعدين اشتغلت سطر مقلوب كله وبعدين السطر الى بعديه زودت بين الغرزتين وبعدين عملت سطر مقلوب كله ياريت تكونى فهمتينى وكملت بنفس الطريقة دى وبعد كام سطر من الشغل لقيت فى غرز فتحت يعنى سابتلى ثقب فى الشغل انا عايزة اعرف من حضرتك ايه الغلط هل كنت اشتغل كام سطر وبعدين ازود ولا انا اشتغلته غلط مع انى متاكدة ان عملته صح مشيت واحدة واحدة مع الخطوات انا عارفة بتعب حضرتك معايا بس انا لسة مبتدئة فمبتلخبطة شوية ياريت تردى عليا وشكرا ليكى

حبيبتى خلينا نمشى خطوة خطوة عشان منتلخبطش
النقطة بتاع يمين وشمال
عشان متلخبطيش نفسك هشرحلك مثال بسيط نفترض اننا عاوزين نزود غرزتين فى سطر معين هنعمل ايه اولا لازم تعرفى ان السطر بتاعك ليه ناحية يمين وناحيه شمال فاحنا هنزود غرزة ناحيه اليمين والغرزة التانيه هنزودها ناحيه الشمال ولكل ناحيه طرق التزويد الخاصه بيها زى ماشرحت خلال الدرس وزى ماقولتلك فى المثال السابق

انتى فهمتى صح بس انا مش بقولك قاعده تمشى عليها انا بس بضربلك مثال لان هيقابلك باترونات كتير وكل باترون وكل موديل له اسلوب وطريقه خاصه به فى التزويد

انا عاوزة اعرف هل انتى اشتغلتى عينه عشان تتدربى على التزويد ولا اشتغلتى موديل معين واستخدمتى فيه الطريقه من التزوويد

على العموم التزويد بيبقا فى السطور العدله زى مانتى عملتى ومش شرط تبداى التزويد من السطر الثانى يعنى على حسب ما الباترون بيقولك بتبداى التزويد بعد كام سم من الشغل ولكن لو كنتى بتجربى فى عينه للتعلم فعادى ابداى التزويد على طول من السطر الثانى
المهم ان الطريقه دى مابتسبش فتحات مكانها لذلك الفتحات اللى اتكونت عندك هتلاقيها غرز ساقطه او سابت منك غصب عنك وملهاش سبب تانى
ممكن تجربى فى عينه جديده وركزى وانتى بتشتغلى عشان الغرز متسبش منك

اتمنى اكون افدتك وانا تحت امرك فى اى استفسار