عندى سؤال فى جاكيت صغير ياريت تفيدنى يالهلوبة

شوفى الشرح ده للزنط هيبقا نفس الشكل بتاع البلوفر ده

-هنلقط حوالى 70-90غرزه على دوران الرقبه وايضا فوق البرواز الامامى
-هنشتغل 4سطور غرزة الطوق فى نفس الوقت هنعمل فتحه للزرار فى اول سطر فوق فتحات الزراير السابقه على البرواز الامامى
-لو مش هنعمل زعبوط او كابتشو هنقفل الشغل ولكن لو هنعمل كابتشو هنكمل كالتالى/
هنشتغل سطر عدل فى نفس الوقت هنخلق 12 غرزه جداد من كل جانب ناحيه البرواز الامامى
وايضا هنزود عدد الغرز بالتساوى على مدار السطر حتى يصل الى 112-117-123(128-133)غرزة
-هنستمر بعمل غرزة الطوق فوق كل الغرز
-هنقفل الشغل عندما يصل الطول الى 21-23-25(27-28)سم هنتنى طرفى الزعبوط من فوق ونخيطه وهنتنى ال12 غرزه اللى زودناهم من كل جانب على البرواز الامامى من الخارج

الجيب بقا اشتغليه مربع او مستطيل بالمقاس اللى يعجبك وبعد كدا خيطيه فى المكان اللى انتى عاوزاه
انما لو كنتى هتشتغليه وانتى بتشتغلى البلوفر كان هيبقا ليه طريقة تانيه اعتقد انها مش هتنفع معاكى بعد ماخلصتى البلوفر

الشكر لله حبيبتى وانا تحت امرك فى اى استفسار

اولا غرزة الطوق عدل فى كل السطور الامامية والخلفية
وفى الموضوع ده توضيح اكثر لغرزة الطوق

غرزة الطوق Garter stitch

نيجى بقا لتانى سؤال
الزنط بيتعمل فى الاساس على دوران الرقبة كله قدام وورا يعنى بتلقطى الغرز على دوران الرقبه كله وكمان بتبقا حردة الرقبة ليها طريقة مختلفة لو انتى هتعملى زنط عليها

وبما انك عاملة حردة الرقبة الامامية مثلثة مش هينفع انك تعملى فوقيها زنط خالص والا البلوفر هيبقا مش مظبوط
ولو برضه هتعملى الزنط على دوران الرقبة الخلفية فقط هيبقا شكله مش ظريف

الحل
لو انتى عندك استعداد تفكى ونظبط حردة الرقبة الامامية بحيث نلقط الزنط على دوران الرقبة كلها
او الحل التانى انك ماتعمليش زنط خالص
الحل الثالث ممكن تعملى زنط منفصل عن البلوفر وتعمليله عراوى ويتركب فى البلوفر بزراير

شوفى الحل المناسب ليكى وانا تحت امرك فى اى استفسارات

حردة الإبط هتفضل زى ماهى انتى هتغيرى بس حردة الرقبة
طبعا لما تفكى السطور هتفكى لحد السطر اللى قبل الحردة

الجاكت الفسفورى شرحه بالكامل فى اللينك ده

http://www.lahlooba.com/forum/knitting-patterns/topic-t1517.html

وعلى العموم حردة الرقبة للمقاس سنتين هتبقا كالتالى

للناحية اليمين

عندما يصل الطول الى 28 سم هنقفل ال 11 غرزة ناحيه البرواز الامامى عشان حرده الرقبه

-هنقفل ايضا عشان حرده الرقبه كما يلى
2غرزه/مرتين
غرزه واحده/4مرات
-عندما يصل الطول الى33 سم هنقفل الشغل

ونفس الشئ للناحية الشمال

اما بالنسبة لحردة الرقبة الخلفية فهتشتغليها كالتالى

عندما يصل الطول إلى32 سم هنقفل ال 30 غرزة اللى فى المنتصف عشان حرده الرقبه
-هنقفل غرزه فى السطر التالى من ناحيه الرقبه من كل جانب
-عندما يصل الطول الى 33 سم هنقفل الشغل

بعد الانتهاء من حردة الرقبة الامامية والخلفية
هنلقط عشان الكابتشو كالتالى


هنلقط حوالى 70-90غرزه على دوران الرقبه وايضا فوق البرواز الامامى
-هنشتغل 4سطور غرزة الطوق فى نفس الوقت هنعمل فتحه للزرار فى اول سطر فوق فتحات الزراير السابقه على البرواز الامامى
_هنشتغل سطر عدل فى نفس الوقت هننشأ 12 غرزه جداد من كل جانب ناحيه البرواز الامامى
وايضا هنزود عدد الغرز بالتساوى على مدار السطر حتى يصل الى 128 غرزة
-هنستمر بعمل غرزة الطوق فوق كل الغرز
-هنقفل الشغل عندما يصل الطول الى 27 سم هنتنى طرفى الزعبوط من فوق ونخيطه وهنتنى ال12 غرزه اللى زودناهم من كل جانب على البرواز الامامى من الخارج

بصى ياقمر انتى لقطى 75 غرزة
المطلوب انك تزودى 50 غرزة تقريبا فى سطر واحد
يعنى هتشتغلى سطر التزويد ده كالتالى هتشتغلى غرزة,هتزودى غرزة,هتشتغلى غرزتين,هتزودى غرزة وهكذا حتى نهاية السطر

وانا تحت امرك فى اى استفسار